Nagapangabay ang isa ka pamilya sa Sta. Barbara, Iloilo nga mahatagan sang hustisya ang kamatayon sang 64-anyos nga amay nga may problema sa paminsaron kag ginapahayag nabiktima sang apat ka magkasunod nga adlaw nga pagpangsapote sa sulod mismo sang merkado.
Ang biktima amo si Efren Naval, residente sang Arroyo St. sa amo nga banwa, kag nagatrabaho bilang kargador sa merkado.
Sa interview sang Bombo Radyo kay Llana Naval, anak sang napatay, iya ginpahayag nga nagpauli ang iya amay sa ila nga balay nga nagpanugid nga ginsakit ini, apang Marso 31 pa sini nahambal kun sin-o ang nagsakit sa iya.
Ginatudlo nga nagsakit amo ang isa ka lalaki nga ginapahayag empleyado man sa public market.
Ginpanugyanan ini sang iya anak nga indi na magbalik sa public market, apang nag-insister pa nga magbalik bangud may kuhaon pa.
Abril 2, nagsakit na ang ulo sang biktima kag sang gindala sa ospital, gindeklarar nga dead-on-arrival.
Gin-abisuhan ang pamilya nga i-freeze anay ang lawas sang biktima kag sang ginpaidalom sa autopsy, natukiban nga nag-angkon ini sang traumatic injuries sa ulo.
May mga witnesses suno kay Naval nga nagpahayag nga ginlampusan sang binial ang ulo sang biktima.
May yara man sang CCTV footage kun sa diin ginapahayag nakit-an mismo ang ginatudlo suspek nga amo ang nagsakit sa amay.
Gin-alegar sang pamilya nga natabo ang pagpangsapote sang Marso 29 tubtub sa Abril 1.
Naga-apelar ang pamilya nga padasigon man ang hustisya bangud ginapahayag nagapasalig ang pulis nga gina-imbestigaran man apang nagapangita sang witnesses agud mahulog sa murder ang kaso.
Nalubong na ang biktima sang Abril 22 apang naga-reklamo ang pamilya nga wala sang progress ang kaso bangud apisar may hawid nga CCTV footage, nakit-an nga nagalagaw-lagaw pa sa merkado ang ginatudlo suspek.
Sang ginpakig-angutan sang Bombo Radyo ang Sta. Barbara Municipal Police Station, ginpahayag ni Pol. Lt. Aileen Clarite, officer in charge sa estasyon, nga mas maayo nga sa ila na makig-angot ang pamilya. ##
