Ginpasidunggan sang Securities and Exchange Commission (SEC) -VI ang Bombo Radyo Iloilo kadungan sang ika-85 nga anibersaryo sini.
Sa interview sang Bombo Radyo kay Atty. Russel Ildesa, director sang SEC-Region VI, iya ginpahayag nga ang plaque of appreciation nga ginhatag sang Bombo Radyo Iloilo ang isa ka pamaagi sang ahensya sa pagkilala sang nangin bulig sang istasyon ilabi na sa tion nga may yara sang lapnagon nga investment scam sa rehiyon.
Sang nagligad nga tuig, ginbuyagyag sang Bombo Radyo Iloilo upod ang sister station sini nga Bombo Radyo Roxas ang pagpanunto sang Chiyuto Creative Wealth Document Facilitation Services ukon Chiyuto Double Your Money Scheme nga ginapamunuan ni Patrocenio Chiyuto ukon mas kilala sa tawag nga Don Chiyuto sa probinsya sang Capiz.
Madamo sang nangin biktima ang nasambit nga scam sa bilog nga rehiyon kag tubtob subong, wala sa gihapon ginbalikan ni Don Chiyuto.
Ang pagkilala sa Bombo Radyo Iloilo ang isa ka pamaagi sang SEC sa paghatag sang pasalamat bilang kabahin sang ila mga active partners.
