ILOILO CITY – Isa sa mga masami nga knee injuries amo ang anterior cruciate ligament (ACL) sprain ukon tear.
Ang masami nga maka-agum sang ACL injury amo ang mga high demand sports pareho sang soccer, football kag basketball.
Suno kay Dr. Cleff Flores, Orthopedic Specialist, ang ginahalinan sang nasambit nga injury amo ang masunod: hinali nga paglain sang direksyon, hinali nga pagpundo, paghinay-hinay samtang nagadalagan kag indi maayo nga pagtupa kun maglumpat.
Sa tion nga may yara ka sang sini nga injury, may mabatian ka nga “popping” noise kag daw matumba ang imo tuhod.
Ang iban pagid sini nga sintomas amo nga sa sulod sang 24 oras, magahabok ang imo tuhod.
Kung may yara ka sang ACL, mahimo ka nga magpaidalom sa operasyon agud nga mabalik sa normal ang sitwasyon sang imo nga tuhod apang nakadepende ini sa severity sang imo nga injury kag activity level.
Halos katunga sang tanan nga injuries sang anterior cruciate ligament ang nagatuhaw nga nagaguba sang structures sang tuhod kaangay sang articular cartilage, meniscus kag iban nga ligaments.
