Indi ma-depensahan sang Filipino-American sprinter nga si Kristina Knott ang iya nga gold medal sa 31st Southeast Asian Games sa Mayo 12-23 sa Hanoi, Vietnam kasunod sang pag-suprer sini sang foot injury.
Gin-anunsyo mismo ni Knott kag sang Philippine Athletics Track and Field Association (Patafa) nga maga-isol si Knot sa kumpetisyon.
Suno sa 26-anyos nga Fil-am runner, maga-focus anay siya sa pagpaayo sa iya nga tiil kag ipaiway anay ang SEA Games; kag kun mag-ayo na, preparahan sini ang Asian Games sa Hangzhou, China kag ang World Championships sa Oregon.
Na-detect ang injury ni Knott sang nagligad pa nga Enero matapos ini nga nagpaidalom sa MRI test.
Ginpahayag man sini nga naghibi man siya bangud dismayado siya nga indi siya makahampang.
Nangguba sang SEA Games record si Knott sang 2019 sang nag-clock ini sang 23.01 seconds sa 200-meter dash — mas madasig sa 23.30 seconds nga na-register sa 2001 Games sa Kuala Lumpur.
Ginguba man sini ang national record paagi sa paglapaw sa rekord sang legendary nga si Lydia De Vega Mercado sa hampang sang 1986.
Gold medalist man si Knott sa 4×100 mixed relay event upod ang iban nga gold medal winners nga sanday Eric Cray, Anfernee Lopena, kag Eloiza Luzon.
Gin-ako sang Patafa nga daku nga kadulaan sang team si Knott apang kumpyansa man si Patafa president Philip Ella Juico nga mangin formidable kag competitive ang iban pa nga mga atleta sang Pilipinas. ##
