ILOILO CITY- Nahatagan sang pribiliheyo sang Commission on Elections(COMELEC) ang Bombo Radyo Iloilo partikular na ang mga reporters kag Bombo volunteers para mas ma-orient sa mga importante nga impormasyon may kaangtanan sa May 9, 2022 national and local elections.
Sa orientation nga ginpatigayon sang COMELEC, natun-an sang maayo sang mga Bombo Radyo reporters kag volunteers ang mga rules and guidelines nahanungod sa piniliay nga importante gid nga elemento para sa madinalag-on nga eleksyon sa Mayo 9.
Actual man nga gin-demonstrate sang COMELEC kag gin-perform sang mga personnel sang Bombo Radyo ang pag-operate kag paggamit sang Vote Counting Machines(VCMs), pag-shade sang balota kag kun paano ini igulo sa VCM, kag madamo nga iban pa.
Sa interview sang Bombo Radyo kay Mr. Jonathan Sayno, Election Assistant II sang Iloilo City COMELEC, iya ginpahayag nga tuman gid ka importante ang ginatungdan nga papel sang media sa eleksyon ilabi na nga nagaserbi ini nga nagapanguna nga source sang impormasyon gani nagakadapat lang bastante ang ila ihibalo.
Apang suno kay Sayno, magluwas sa media, katungdanan man sang mga botante nga i-edukar ang ila kaugalingon agud nga mangin mahapos kag matalunsay ang ila pagboto sa adlaw sang eleksyon.
