ILOILO CITY- Gin-aprubahan na ni Iloilo City Mayor Jerry Trenas ang tanan nga application sang mga eskwelahan sa Department of Educations- Schools Division of Iloilo City nga magpatigayon na sang limited face to face classes.
Sa interview sang Bombo Radyo kay Mayor Trenas, iya ginpahayag nga napagwa na ini tanan nga applications sa iya opisina kag mahimo na ini nga makuha sang mga concerned nga eskwelahan.
Siuno sa alkalde,gilayon niya nga gin-aprubahan ang mga applications bangud nga nagapati siya nga indi gid epektibo ang blended learning nga ginapatuman sang Department of Education.
Magluwas sa limited face to face classes, nalakip sa mga applications amo ang pagpatigayon sang face to face exam kag face to face graduation ceremonies.
