Positibo ang business sector nga maga-appoint si presumptive President Ferdinand “Bongbong” Marcos, Jr. sang economic manager nga amo ang magapanguna sa pag-oversee sa pagpabangon sa ekonomiya sang pungsod.
Sa interview sang Bombo Radyo kay Engineer Terence Uygongco, spokesperson sang business organization nga Iloilo Economic Development Foundation Inc. (ILEDF), iya ginpahayag nga magluwas sa economic team ni Marcos, ginabantayan subong sang business groups ang economic priorities sang bag-o nga administrasyon.
Ginplastar ni Uygongco nga magluwas sa domestic consumption, ang foreign remittances ukon ang remittances sang overseas Filipino workers (OFWs) kag ang Business Process Outsourcing (BPO) sector amo ang duha sa mayor nga contributor sa gross domestic product (GDP) growth sang pungsod.
Dapat siguraduhon sang Marcos administration suno kay Uygongco nga aktibo kag nagauswag pa gid ang kontribusyon sining duha agud nga mapabilin nga indi marumpag ang ekonomiya sang pungsod.
Ang BPO amo ang ginapahayag nagbulig sustinir sa ekonomiya sang Pilipinas sa tunga sang pandemya kag lakip diri ang bulig sang call centers, insurance, life sciences, healthcare, kag data analytics.
Una na nagpasalig si Marcos nga nagapanguna sa priority list sa potential appointments amo ang economic managers bangud ini nga team amo ang magapabulig sa pungsod sa tunga sang pandemya kag economic crisis.
