Plastado na ang mga Local Governance Transition Teams (LGTT) nga amo ang maga-facilitate para sa matalunsay nga local governance transition sa bag-o na-eleher nga mga opisyal sa tagsa ka banwa sa probinsya sang Iloilo.
Sa Hunyo 30, maga-conduct sang turnover ceremony sa newly-elected officials kun sa diin patigayunon ang pagturn-over sang tanan nga official documents ukon records sang LGU official transactions, assets, kag propiedad halin sa previous administration pakadto sa bag-o nga magapungko nga mga opisyal.
Sa interview sang Bombo Radyo kay DILG Iloilo Director Teodora Sumagaysay, iya ginpahayag nga kun halimbawa re-elected ang isa ka opisyal, kinahanglan gihapon nga may yara sang governance assessment report kun sa diin i-presentar sa iban nga local officials ang hangkat kag mga problema nga tutukan sang administrasyon.
May yara sang transition teams suno kay Sumagaysay nga nagapatigayon sini nga mga turnover ceremony antes ang Hunyo 30 kun san-o magapungko ang elected official.
Ang LGTT ang ginapamunuan sang local chief executive.
Myembro diri ang LGU department heads; DILG representatives kaangay sang DILG Provincial Director sa lebel sang provincial government, DILG City Director sa lebel sang city government, kag DILG Municipal Local Government Operations Officer (LGOO) sa lebel sang municipal government; kag secretary sang local Sanggunian.
Dapat man nga may yara sang isa ka tiglawas halin sa civil society organization (CSO) ukon people’s organization (PO).
Ang vice-chairperson naman ang pilion lang sang mga myembro. ##
