ILOILO CITY- Ginpalukpan sang armas kag gin-harass sang mga ginaalegar tinawo ni Mina, Iloilo Mayor Rey Grabato ang isa ka residente sa Bangac, Mina, Iloilo.
Sa interview sang Bombo Radyo sa tagreklamo nga si Zayla Davila, iya ginpahayag nga ginpadulungan ini sang mga tinawo ni Grabato kag ginpangguba ang kudal sang iya ginapanag-iyan nga duta.
Suno kay Davila, sang iya ginkompronta ang mga tinawo ni Grabato, isa sa ila ang nagpalupok sang armas nga ginkilala niya nga si Ronilo Pitipit.
Pahayag ni Davila, indi lang ini ang una nga bes nga gin-harass siya sang mga tinawo sang alkalde.
Gintuad man niya nga madugay na siya nga nakabaton sang pagpamahog sa iya kabuhi kag base sa iya alegasyon, si Grabato ang luyag magpapatay sa iya.
Gin-ako man niya nga lain nga kandidato sa pagka-alkalde ang iya ginsuportahan sa eleksyon.
Nahibaluan nga ang Mayor-elect sang Mina nga si Lydia Grabato ang asawa sang incumbent mayor apang ang ginsuportahan ni Davila amo si Teodoro Camarista.
Wala pa sang sabat ang kampo ni Grabato.
