ILOILO CITY- Gintawag sang anay kadre sang rebelde nga grupo kag subong nagaserbi nga consultant sang National Task Force to End Local Communist Armed Conflict (NTF-ELCAC) nga si Jeffrey Celiz, ang kampo ni Vice President Leni Robredo nga manugpadihot sang mga hublag agud bungkagon kag gub-on ang gobyerno.
Sa interview sang Bombo Radyo kay Celiz nga nagaserbi man nga national coordinator sang Sentrong Alyansa ng mga Mamamayan para sa Bayan (SAMBAYANAN), iya ginpahayag nga ang mga nagakatabo subong nga mga hublag protesta ang resulta sang pagpangsutsot sang mga
sumalakdag sang Communist Party of the Philippines-New People’s Army-National Democratic Front (CPP-NPA-NDF).
Suno kay Celiz, paagi sa mga pagpatigayon sang mga hublag, luyag sang mga makawala nga grupo nga garit-gariton ang gobyerno kag itulod nga maghimo sang extreme nga mga tikang.
Pahayag niya, ini man ang estilo sang CPP-NPA-NDF sang panahon ni anay Presidente Ferdinand Marcos Sr. nga suno kay Celiz,amo ang nagtulod sa gobyerno ni Marcos nga magdeklarar sang martial law kag indi malayo nga himuon nila ini liwat sang makawala nga grupo agud nga mapilitan ang administrasyon ni presumptive president Ferdinand Marcos Jr. nga maghimo man sang kasubong nga tikang kag paggwaon nga malain ang gobyerno.
Nagpangabay naman si Celiz sa kampo ni Robredo nga maghimo sang tikang agud pakalmahon ang mga hublag-protesta nga nagakwestiyon sa resulta sang eleksyon agud nga indi na maggamo pa ang pungsod.
