ILOILO CITY – Nagpanawagan ang labor sector nga buligan sang mga kompaniya nga ma-implementar ang pagpasaka sang sweldo sa Western Visayas sa tion nga ma-aprubahan na sang National Wages and Productivity Board (NWPB) ang wage order sang rehiyon.
Gin-anunsiyo sang Department of Labor and Employment (DOLE)- VI nga pasaka-an ang daily minimum wage sang private workers sa non-agricultural, industrial kag commercial sectors lakip na sa agricultural sector.
Sa mga agricultural workers, humalin sa P410 nga minimum wage per day, magasaka na sa P315.
Sa non-agricultural, industrial kag commercial workers, humalin sa P395 nga minimum wage per day, magasaka sa P450 sa mga kompaniya nga masobra sa pulo ang trabahante samtang humalin P310, magasaka sa P420 nga minimum wage per day sa mga kompaniya nga may yara sang pulo kag mas manubo pa nga numero sang trabahante.
Sa interview sang Bombo Radyo kay Wennie Sancho, labor representative sa Regional Tripartite Wages and Productivity Board (RTWPB), iya ginpahayag nga ang implementation gid lamang ang mangin problema sa tion nga maaprubahan na ang pagpasaka sang sweldo.
Ang mga empleyado ang nakulbaan man nga madulaan sang trabaho sa tion nga magreklamo sila batuk sa ila nga kompaniya.
Suno kay Sancho, ang pagpasaka sang sweldo ang makabatak sang kapigaduhon sang mga mamumugon sa Western Visayas kag ma-restore ang nagasarurot na nga purchasing power sang Philippine peso.
Dugang pa ni Sancho, indi lamang ang mga negosyo ang apektado sang pandemya kundi mangin ang mga mamumugon nga underpaid man.
Sa mga kompaniya naman nga indi makasarang sang wage increase, mahimo nga file sang petition for exemption.
Ang pagpasaka sang sweldo sang mamumugon sa Western Visayas ang indi pa pinal kag nakadepende sa review sang National Wages and Productivity Board.
