ILOILO CITY- Gindula na ang pag-require sang vaccination card para sa mga tawo nga nagatabok sa probinsya sang Guimaras.
Ini kasunod sang gin-isyu ni Guimaras Governor Samuel T. Gumarin nga Executive Order No. 28 angot sa pagpabilin sang probinsya sa idalom sang Alert Level 1.
Sa interview sang Bombo Radyo kay Vice Governor Atty. John Edward Gando, iya ginpahayag nga santo sa bag-o nga protocol, ang mga returning residents kag ang mga residente sang Western Visayas ang indi required nga magpakita sang COVID-19 vaccination card sa tion nga magsulod sila sa Guimaras.
Apang,suno kay Gando, kinahanglan sa gihapon nga mag- fill out sang Health Declaration Forms kag mag-obserbar sang Minimum Health Standards.
Suspended man ang pagpatuman sang Inbound Pass kag Outbound Resident Pass.
Ang mga indibidwal naman nga may sintomas sang COVID-19, ginakabig suspect/probable/confirmed case sang COVID-19 ang indi pagpasudlon sa probinsya.
Ang mga unvaccinated non-residents halin sa gwa sang Region 6 ang dumilian man nga magsulod sa probinsya magluwas lang kun makapakita ini sang negative RT-PCR test result.
