May person of interest na nga ginasundan ang Jaro Police Station kasunod sang pagpang-hold up sa isa ka convenience store sa MV Hechanova, Jaro, Iloilo City.

Nataban ang ginabanta P10,000 nga cash gikan sa amo nga store.

Sa interview sang Bombo Radyo kay Police Captain Eduardo Siacon, Jr., hepe sang Jaro Police Station, iya ginpahayag nga pagsulod sang suspek, nagdiretso ini kuha sang itlog.

Sunod ini nga naglibot kag nagtupad sa cashier, nanaya sang pusil, kag ginkuha ang kuwarta.

Wala sang iban nga tawo sa store kag wala man ang guwardiya sang natabo ang pagpang-hold-up.

Nagpalagyo ang suspek sakay sa iya nga motorsiklo kag ginapahayag padulong sa Barangay Tagbak ang direksyon.

Suno kay Siacon, nakasuksok ang suspek sang bonnet nga itom sang ginhimo sini ang krimen.

May ginpakita nga pictures ang mga pulis sa cashier kag na-identify sini ang isa ka laragway nga may kaanggid sa amo nga suspek.

Nagapadayon pa ang imbestigasyon suno sa pulis.

DUGANG NGA SEGURIDAD

Gina-engganyo naman sang Iloilo City Police Office (ICPO) ang mga business establishments sa syudad ilabi na sa mga naga-operate 24/7 nga mag-hire sang security guard agud nga malikawan nga may makalusot nga kawatan.

Sa interview sang Bombo Radyo kay Pol. Col. Leo Batiles, director sang ICPO, iya ginpahayag nga sa iya pagpungko bilang ICPO director diri sa syudad, labing-una nga tion ini nga may establisyemento nga ginsulod gid sang suspek nga may dala nga armas.

Nakakita sang tyansa ang suspek suno kay Batiles bangud wala sang guwardya kag wala sang kustomer sang amo nga tion.

Apisar nga malaka lang ini matabo suno kay Batiles, indi dapat magkumpyansa kag indi na paghatagan tyansa ang kriminal nga makakita oportunidad nga makapang-holdup.

Wala sang may gina-monitor nga robbery group sa Iloilo City suno kay Batiles, kag ginapatihan nga freelancer ang amo nga suspek.

Ginmanduan na ang Jaro Police Station nga padayunon ang imbestigasyon agud madakpan ang amo nga suspek. ##