Ginpasalig sang Philippine Drug Enforcement Agency (PDEA) nga agresibo ang away sang Western Visayas kontra sa iligal nga droga — halog man ukon indi ang mobility restrictions.
Sa interview sang Bombo Radyo kay Graziella Tanaleon, spokesperson sang PDEA Region VI, iya ginpahayag nga nakatutuk ang ahensya sa drug clearing operations sa rehiyon ilabi na sa mga pantalan kag terminal.
Bulanan ang validation suno kay Tanaleon indi lang sa uncleared barangays kundi pati sa drug-cleared barangays.
Suno pa sa natungdan, aktibo man ang barangay sa pag-report kun may residente nga ginaduha-duhaan nga may kahilabtanan sa iligal nga droga.
Una diri, nagpaandam si Interior Undersecretary Epimaco Densing nga magataas ang demand sa iligal nga droga subong nga ginpahalugan na ang restrictions sa hulag sang tawo.
Ginapahayag nga madamo ang nagakadulaan sang trabaho, kag ginapanan-aw sang nasambit nga DILG official nga mangita gid sang alternatibo nga paagi ang tawo nga makakita sang kuwarta kag isa na diri ang transaksyon sa iligal nga droga.
