Nakatipon ang Iloilo Provincial Government Environment and Natural Resources Office (PGENRO) sang 4.3 nga tonelada nga campaign waste materials.
Kasunod ini sang “Limpyo Eleksyon Program” nga ginlunsar sang Iloilo Provincial Government agud hawanan ang probinsya pagkatapos sang May 9 national and local elections.
Sa interview sang Bombo Radyo kay Mitzi Peñaflorida, senior environmental management specialist sa PGENRO, iya ginpahayag nga ginmanduan naman ang Municipal Environment and Natural Resources Office (MENRO) nga ipangbutang sa ila nga material recovery facility ang mga tarpaulins kag posters.
Ang mga materyal nga pwede pa magamit amo ang himuon nga eco-bags agud ipanagtag sa komunidad sa tuyo nga mahagan-hagan ang paggamit sang plastic.
Suno kay Peñaflorida, nakapakig-angot man ang PGENRO sa Bureau of Jail Management and Penology-Iloilo City District Jail-Female Dormitory bangud magabulig man ang Persons Deprived of Liberty (PDL) sa pag-upcycle sang nakolekta nga campaign waste materials.
May women’s organization nga iga-tap nga magatahi sang mga ma-recycle nga mga campaign posters.
