Wala pa sang impormasyon nga nabaton ang Iloilo Police Provincial Office (IPPO) kaangot sa plano nga pagsungka sang isa sa mga suspek sa Claire Diergos Murder case.
Ang ginatumod nga suspek amo si Raffy Sorioso nga isa sa tatlo nga gin-indict sa ginpatigayon nga preliminary investigation sang Iloilo Provincial Prosecutor’s Office matapos nakitaan sang probable cause nga pasakaan sang kaso nga murder.
Sa interview sang Bombo Radyo kay Police Senior Master Sergeant Francisco Lindero, Jr., spokesperson sang IPPO, iya ginpahayag nga kun mag-surrender gid man si Sorioso, daku ini nga development sa kaso.
Presuhon ini depende sa kun diin siya nga police station maga-turn over sang iya nga kaugalingon.
Sa separado nga interview sang Bombo Radyo kay Atty. Dwight Trasadas, legal counsel ni Sorioso, una na nga ginpahayag nga plano ni Sorioso nga magsungka sa masunod nga semana antes ang arraignment sang murder case sa Mayo 24.
Ginapahayag nga may ginaasikaso lang si Sorioso para sa iya pagsungka apang wala naman ginkumpirma kun kay sin-o ini magasungka.Ginpahayag naman ni Trasadas nga maga-file sila sang motion to post bail.
Si Sorioso ang nagaserbe anay nga aide sa pamilya ni anay San Dionisio Iloilo, Mayor Peter Paul Lopez, iya asawa nga si Sally Lopez kag tatlo nila ka kabataan.
Ang murder complaint nga ginpasaka batok sa amo nga pamilya ang na-dismiss bangud ginpahayag sang piskalya nga indi bastante ang ginpasa nga mga ebidensya.
Matandaan nga magluwas kay Sorioso, nadutlan man sang kaso si Rudelyn Sumbong nga timbang ni Diergos kag nakahunong na subong sa New Lucena Municipal Police Station matapos nagsungka kasunod sang gin-isyu nga arrest warrant batok sa iya.
At-large naman ang isa pa ka suspek nga nadutlan sa kaso nga si Gardo Ibrahim. ##
