Malayo ang gintabog sang korona sang reigning champion nga Pilipinas sa Southeast Asian Games (SEA Games) matapos nga nagpang-apat lang sa medal tally sa 31st SEA Games sa Hanoi, Vietnam.
Magatakop na subong nga adlaw, Mayo 23, ang nasambit nga hinampang.
Nakatipon ang Pilipinas sang kabug-usan nga 223 ka medalya — 52 diri ang gold medals, 70 ang silver medals, kag 101 ang bronze medals.
Sa katapusan nga adlaw sang makahalawat-hawat nga hampang kahapon sang mga atleta, lima ka gold medals ang natipon para sa pungsod.
Nakuha ini sang boxers nga sanday Eumir Marcial (daog sa Men’s Middleweight), Rogen Ladon (daog sa men’s under-52kgs division paagi sa split decision), kag Ian Clark Bautista (daog paagi sa 5-0 unanimous decision sa men’s -57kg).
Na-depensahan naman sang Gilas Pilipinas Women ang gold medal women’s basketball apisar nga napierde ini sa ila katapusan nga hampang batok sa Malaysia sa score nga 96-93.
Nagtapos ang SEA Games campaign sang Gilas women sa 4-1 record.
Ang nasambit nga basketball tournament ang may yara sang single-round format kun sa diin ang team nga may best record amo ang makakuha sang kampyeonato.
Ang ika-lima nga gold medal kagab-i ang nagikan kay Philip Delarmino matapos ginpaboran ang iya nga protesta.
Ginhatag ang gold medal kay Delarmino sa men’s muay 57kg event.
Inisyal nga gindeklarar nga silver medalist si Delarmino, apang ginbaliskad ang desisyon kagab-i.
Ginhatag kay Delarmino ang gold medal, samtang ang iya naman nga kasumpong nga Vietnamese nga si Nguyen Doan Long amo ang ginhimo nga silver medalist.
MASSIVE UPSET
Nabuy-an naman sang Pilipinas ang isa sa pinaka-importante nga medalya sa SEA Games — isa sa ginakabig pinakadaku nga upset subong nga edition sang biennal meet.
Huyhuy ang abaga sang Gilas Pilipinas bangud sa labing-una nga tion sa masobra tatlo ka dekada, napaslawan ini nga madala-pauli ang gold medal halin sa SEA Games.
Indonesia ang nagpatilaw sang mapait nga kapaslawan sa basketball team sang Pilipinas matapos nga nagtakop ang hampang sa score nga 85-81.
Ini na kuntani ang ika-14 nga sunod-sunod nga gold medal sang Gilas Pilipinas sa SEA Games kun nasarangan sini ang pwersa sang Indonesia.
Ang gin-stage sang Indonesia nga monumental upset amo ang naghatag sang labing-una nga gold medal para men’s basketball team sang ila nga pungsod sa SEA Games.
Katapusan nga wala nakadaog sang gold medal ang Pilipinas sa basketball sa SEA Games ang natabo pa sang 1989 sang nakuha sang Malaysia ang kampyeonato.
Ang kadalag-an naman sang Indonesia ang magaserbe nga daku nga confidence-booster sa ila pag-tinguha nga maka-qualify sa FIBA World Cup sa masunod nga tuig.
SEAG Tally
Yari ang latest medal tally.
1 Vietnam- 205 golds, 121 silver, 115 bronze kag total nga 441 medals
2 Thailand- 90 golds, 103 silver, 134 bronze kag total nga 327 medals
3 Indonesia- 69 golds, 91 silver, 81 bronze kag total nga 241 medals
4 Philippines- 52 golds, 70 silver, 101 bronze kag total nga 223 medals
5 Singapore- 47 golds, 46 silver, 73 bronze kag total nga 166 medals
6 Malaysia- 39 golds, 45 silver, 90 bronze kag total nga 174 medals
7 Myanmar- 9 gold, 18 silver, 35 bronze kag total nga 62 medals
8 Cambodia- 8 golds, 13 silver, 38 bronze kag total nga 59 medals
9 Laos- 2 gold, 7 silver, 32 bronze kag total nga 41 medals
10 Brunei- 1 gold, 1 silver, 1 bronze kag total nga 3 medals
11 Timor Leste- 3 silver and 2 bronze kag total nga 5 medals
