Wala pa sang tinimok-timok ang pulis nga nadakpan sa drug buy bust operation sa Brgy. North Fundidor Molo, Iloilo City kaangot sa iya sources ukon iban pa nga nahibaluan sa transaksyon sa iligal nga droga.
Matandaan nga ang gin-aresto sang Domingo, Mayo 22, amo si Police Staff Sergeant Igmedio Cristobal, Jr., 40, residente sang Brgy. Jereos, Lapaz, kag assigned sa Regional Election Monitoring and Action Center sa Police Regional Office (PRO) VI.
Nakuha sa possession ni Cristobal ang masobra P374,000 nga balor sang ginapatihan iligal nga droga.
Sa interview sang Bombo Radyo kay Pol. Lt. Col. Arnel Solis, spokesperson sang PRO- VI, iya ginpahayag nga ipaagi man sa due process kun i-file na ang criminal kag administrative cases batok sa amo nga pulis.
May imbestigasyon nga himuon, i-determinar kun may probable cause ang kaso, kag lantawon ang tanan nga ebidensya nga iplastar sang otoridad amo man ang ebidensya nga iplastar naman sang kampo ni Cristobal.
Sa administrative case ilabi na sa involved sa illegal drugs, ginpahayag ni Solis nga posible nga ‘conduct unbecoming of a police officer’ ang atubangon ni Cristobal.
Isa ini ka major offense kun sa diin ang pinaka-nubo nga sentensya amo ang suspension sa sulod sang anum ka bulan; medium nga penalidad amo ang pagnubo sang rangko; kag ang pinaka-mataas nga silot amo ang pagpahalin sa serbisyo sa Philippine National Police (PNP).
Ginpaathag naman ni Solis nga indi na hawid sang PRO 6 ang akto ni Cristobal kun wala na ini sa duty.
Matandaan nga una na ginkumpirmar nga antes pa man nadakpan sa drug buy bust, may yara na ini sang administrative case sang 2016 nga irregularity in the performance of duty apang naserbehan na niya ang iya sentensya.
