ILOILO CITY – Nagdangat sa 19 ka persona sa Western Visayas ang nagtaliwan bangud sang dengue subong nga tuig.
Sa interview sang Bombo Radyo kay Dr. Bea Camille Natalaray, Non-Communicable Diseases Prevention Program kag spokesperson sang Department of Health (DOH)- VI, iya ginpahayag nga as of May 14, may yara na sang 19 ka mga nagkalamatay sa rehiyon bangud sang dengue.
Sa kabug-usan, may yara sang 1,355 nga kaso sang dengue sa rehiyon kun sa diin, nagdangat sa 75% ang pagsaka kun ikumpara sa amo man nga period sang nagligad nga tuig nga may yara gid lamang sang 775.
Suno kay Natalaray, ang Negros Occidental ang may yara sang pinakadamo nga kaso sang dengue nga naglab-ot sa 518 nga may lima ka nagkalamatay.
Ang Antique ang nagapangaduha nga may yara sang 316 nga kaso kun sa diin, duha ang patay.
Nagapangatlo ang probinsya sang Iloilo nga may yara sang 222 kag anum diri ang nagkalamatay nga ginasundan sang Bacolod City nga may 121 ka kaso kag apat ang napatay.
Samtang, yari ang data sa iban pa nga probinsya: sa Capiz, may 86 ka kaso; Aklan kag Iloilo City nga may lunsay 39 ka kaso kag isa ka patay kag sa Guimaras nga may 14 ka kaso kag wala sang napatay.
Bangud sini, nagpanugyan si Natalaray sa mga local government units (LGU) sa anum ka mga probinsya kag duha ka highly urbanized cities sa rehiyon nga magdoble pa sang ila anti-dengue campaign.
Dugang pa ni Natalaray nga dapat pasanyugon pa ang 4S strategy – search and destroy; self-protection measures; seek early consultation, kag support fogging or spraying.
