ILOILO CITY- Dismayado ang asosasyon sang mga vendors sa Iloilo Central Market matapos nga wala sila gin-imbitar nga magtambong sa pagsinapol nga ginpatawag ni Iloilo City Mayor Jerry Treñas may kaangtanan sa pagpaidalom sa Public Private Partnership (PPP) sang amo nga merkado kag sang Iloilo Terminal Market ukon Super.
Sa interview sang Bombo Radyo kay Mr. Rex Donasco, presidente sang Association of Stall Owners & Transient Vendors (ASTRAVEN) sa Iloilo Central Market, iya ginpahayag nga duha ka tuig na ang nagligad sang ulihi sila nga ginpatawag ni Mayor Trenas sa isa ka conference agud istoryahan ang privatization sang amo nga merkado publiko.
Suno pa sa iya, sang nagligad nga semana, nakapamangkot man ini kay Ma. Dolores Trabasas, market-in-charge sang Iloilo Terminal Market kun may ano gid man ang plano ni Mayor apang ang sabat lang ni Trabasas amo nga naga-income man ang concerned nga mga merkado kag indi na kinahanglan nga ipaidalom ini sa PPPP.
Apang nakibot na lang si Donasco nga nagpatigayon sang pagsinapol kahapon kag wala sila maimbitar.
