ILOILO CITY- Gin-lift na sang Iloilo City Government ang pag- ban sang entry sang egg products.
Sa interview sang Bombo Radyo kay Dr. Tomas Forteza, head sang Iloilo City Veterinary Office, iya ginpahayag nga matapos ang halos isa ka bulan nga pagpatuman sang ban bangod sa pamahog sang “bird flu”, ini ang dulaon.
Suno kay Dr. Forteza, ang pag-lift sang ban ang resulta sang ginakulang na nga suplay sang itlog sa Iloilo kag ang mataas nga presyo sini.
Pahayag ni Forteza,ang pag-lift sang ban ang ginpaagi sa gin-isyu ni Mayor Jerry Treñas nga Executive Order (EO) No. 52 kun sa diin nasaad nga mahimo na makasulod sa syudad ang mga table eggs, salted eggs, quail eggs, kag mga embryonated eggs ukon balut apang sa kondisyon nga nagatuman sa gihapon sa mga pagsulundan.
Suno pa kay Forteza nga sa pag-transport sang balut, kinahanglan natinluan na ini sang food grade disinfectant ukon acetic acid dilution sang shipper kag trader bag-o pa man ini i-transport halin sa mainland Luzon pakadto sa Iloilo.
Dugang niya, kinahanglan man nga mag-agi sa ultraviolet light disinfection sa pwerto ang mga salakyan nga gamiton nga magakarga sang mga balut kag kinahanglan nga lutuon gilayon ang mga balut sa tion nga mag-abot na ini sa syudad.
Sa pihak nga bahin, ang mga table egs, salted eggs, quail eggs, kag ang balut ang dapat iplastar sa sanitized trays ukon containers.
Gin-extend naman ang ban sa mga poultry animals kaangay sang mga pispis, pato, pugo, kag poultry nga halin sa mainland Luzon kag mga apektado nga lugar sa Mindanao bangud sa pamahog sang bird flu virus.
