ILOILO CITY – Wala sang may nakita nga problema ang Department of Education (DepEd) sa modality sang pagtudlo sa Alternative Learning System (ALS) sa tion nga mabalik na sa normal ang education system sa pungsod.
Sa interview sang Bombo Radyo kay Nestor Paul Pingil, focal person sang Alternative Learning System- Region VI, iya ginpahayag nga antes pa man ang pandemic, ang hybrid learning na ang ginagamit.
May yara nga radio-based, modular-based kag nagakadto ang mga manunudlo sa komunidad kun sa diin yara ang ila nga mga estudyante.
Suno pa kay Pingil, kun mabalik na sa normal ang education system, padayunon man sa gihapon sang DepEd ang nasuguran na sang una.
Apang suno kay Pingil, madamo sang nag-untat sa pag-eskwela kag may yara man sang nagbalik sa normal education bangud pareho man lang ang modality sang pagtudlo.
