ILOILO CITY – Gin-anunsiyo sang Asian Development Bank (ADB) nga aprubado na ang $400 million ukon P20.9 billion nga loan sang Pilipinas agud nga magbulig sa pungsod nga mapasangkad ang domestic capital markets kag madugangan ang supply sang long-term finance.
Sa ginpagwa nga statement sang ADB, ang policy-based loan nga ginatawag nga “Support to Capital Market-Generated Infrastructure Financing Program, Subprogram 2” ang magabulig sa Pilipinas agud nga magporma sang “efficient domestic debt market” kag mapasakaan ang institutional participation sa merkado ilabi na sa insurance kag pension funds.
Suno kay ADB principal financial sector specialist for Southeast Asia Stephen Schuster, ang Pilpinas ang nagakinahanglan sang nagkalain-lain nga sources sang long-term nga financing agud nga masuportahan ang pagbangon sa COVID-hit industries.
Ini ang ginalakipan sang micro, small, and medium-sized enterprises (MSMEs) nga amo ang ginakabig nga backbone sang ekonomiya sang pungsod.
Kinahanglan man sang pungsod ang funding agud nga maka-provide sang “social protection” kag “infrastructure development priorities”.
Ang gin-aprubahan nga loan ang makabulig sa pungsod agud nga makaporma sang enabling environment nga maka-enganyo sang long-term investors.
Ang ADB ang nag-aprubar sang binilyon ka pesos nga balor sang assistance para sa pungsod humalin sang nagsugod ang COVID-19 crisis.
Sa pagtakop sang 2021, nagdangat sa P11.73 trillion nga utang kag pagdangat sang Marso 2022, nagtimbu-ok pa sa P12.68 trillion suno sa Bureau of Treasury.
Ang utang sang Pilipinas ang nagdala sang debt-to-GDP ratio nga 60.5 percent sang 2021 kag 63.5 percent sang Marso 2022 halin sa 39.6 percent antes ang COVID-19 pandemic.
Apisar sini, ginpasalig sang mga economic managers nga ang utang sang pungsod ang manageable sa gihapon.
