ILOILO CITY – Patay ang duha ka tuig nga bata matapos nga nakabunggo sa stock pile ang angkar-angkar nga ginasakyan sa Barangay Lay-ahan, Pototan, Iloilo.
Ang napatay amo si Alyas Ethan.
Ang driver naman sang angkar-angkar amo si Johnrey Luchar, 30, sang Barangay Malusgod, Pototan.
Sa interview sang Bombo Radyo kay PSSgt. Richard Cabucos, imbestigador sang Pototan Municipal Police Station, iya ginpahayag nga naghalin sa Barangay Sinuagan, Pototan ang angkar-angkar kag pauli na kuntani sa Barangay Malusgod apang sang nakalab-ot sa Barangay Lay-ahan, nakabunggo ang angkar-angkar sa baras sa nagatumpok nga baras sa kilid sang dalan matapos nga nadulaan sang kontrol sa manibela dugang pa nga madasig ang pagpadalagan sini.
Santo sa imbestigasyon sang kapulisan, naka-inom sang makahulubog nga ilimnon si Luchar sa balay sang liya ugangan sa Barangay Sinuagan.
Pito tanan ang sakay sa angkar-angkar lakip na ang driver.
Magluwas sa duha ka tuig nga napatay, pilason man ang iya iloy kag ang live-in partner sang driver sang angkar-angkar lakip na ang iya duha ka mga bata.
Sa subong, padayon pa nga ginapangita ang driver bangud nga nagpalagyo bangud posible nga nakulbaan sa natabo.
Paga-istoryahan naman sang magtimbang nga pamilya kun bala mapasaka sang kaso batuk sa driver sang angkar-angkar.
