Patay ang isa ka lalaki matapos ginluthang sang lalaki nga kaupod man niya sa pag-inum inum sa Barangay Lawigan, San Joaquin, Iloilo.
Ang biktima amo si Romeo Palco, 40, residente sang nasambit nga barangay.
Ang suspek naman amo si Alias Boy, residente sang Barangay Poblacion, Sibalom, Antique, apang may live-in partner man sa Barangay Lawigan.
Sa interview sang Bombo Radyo kay Pol. Lt. Dionisio Estacio, hepe sang San Joaquin Municipal Police Station, iya ginpahayag nga may daan nga hiligut-anon ang biktima kag ang suspek kag nabukaran sang magkaupod sila nga nag-inom.
Ginapahayag nga malapit ang suspek sang gintiro ang biktima rason nga sa mata gid ang igu sini.
.45 caliber pistol ang gingamit sang suspek sa pagpatay sa biktima.
Padayon pa nga ginapangita ang suspek. ##
