Nagtimbuok pa sa P12.76 trillion ang utang sang Pilipinas sa katapusan nga bahin sang Abril, 2022.
Suno sa Bureau of Treasury, mas mataas ini sang 0.7 percent ukon P83.40 billion sa P12.68 trillion nga narekord nga utang sang pungsod sang bulan sang Pebrero.
Sa kabug-usan nga utang, 30 percent ang halin sa guwa sang pungsod, kag 70 percent ang domestic borrowings.
Ang P8.93 trillion nga domestic debt sang Abril ang ginapahayag nga 0.8 percent nga mas mataas ipaanggid sa utang sang bulan sang Marso.
Ang external debt naman nga P3.83 trillion ang mas mataas sang 0.4 percent ipaanggid sang nagligad nga bulan.
Sandig sa rekord sang Bureau of Treasury, halin sang nagpungko si Presidente Rodrigo Duterte, nag-sobra sa doble ang utang sang pungsod halin anay sa P5.95 trillion nga narekord sa katapusan sang Hunyo 2016.
Ang incoming administration ni president-elect Ferdinand ‘Bongbong’ Marcos, Jr. ang nagapangatubang sang responsiblidad nga magsalo sini nga utang samtang nga ginatutukan man ang pagpabangon sang ekonomiya.
Una na nga ginpahayag sang Department of Finance (DOF) nga may yara sang fiscal consolidation plan agud nga makatipon sang P284 billion kada tuig sa masunod nga napulo ka tuig.
Ini agud makumpleto bayad ang P3.2 trillion nga nautang sang Pilipinas bangud sa gingasto bilang response sa COVID-19 pandemic.
Ini nga fiscal consolidation plan ang nagalakip sang pagpatuman sang bag-o nga buwis, pag-postpone sang personal income tax reductions, kag pagpasangkad sang value added tax base.
