ILOILO CITY – Wala sang may nakita nga problema si Iloilo Governor Arthur Defensor Jr. sa implementasyon sang Local Public Transport Route Plan (LPTRP) sang syudad sang Iloilo sa Hunyo 12.
Sa interview sang Bombo Radyo kay Defensor, iya ginpahayag nga nakapatigayon na sang pagsinapol ang Iloilo Provincial Planning and Development Office (IPPDO) kag si Atty. Dennis Ventelacion nga amo ang provincial administrator upod sa counterpart sini sa Iloilo City government.
Suno kay Defensor, base sa pagsinapol, wala sang dako nga adjusment ang probinsya.
Ang problema lang suno kay Defensor amo nga posible nga kulangon ang salakyan nga masalo sang mga pasahero nga nagikan sa probinsya.
Nahibaluan nga sa idalom sang LPTRP sang syudad, asta gid lamang sa terminal ang mga provincial jeepneys.
Bangud sini, nagpadala sang sulat ang probinsya sa Land Transportation Franchising and Regulatory Board (LTFRB) Region VI nga nagahingyo nga kun mahimo nga maka-extend sang byahe ang mga city loop nga salakyan sa mga terminal nga panaugan sang mga pasahero nga nahamtang na sa probinsya sang Iloilo kaangay sa terminal sa isa ka mall sa banwa sang Pavia.
Ini agud nga may masalo sang mga taga-probinsya padulong sa syudad.
