ILOILO CITY – Liwat nga igaduso sang Association of Taxi Operators in Panay (ATOP) ang request nga P10 nga provisional increase sang flag down bangud sang padayon nga pagsaka sang presyo sang gatung.
Sa interview sang Bombo Radyo kay Mr. Perfecto Yap, presidente sang ATOP, iya ginpahayag nga magluwas sa nagasaka nga presyo sang gatung, wala pa sa gihapon nahatag ang subsidy para sa ila tubtob subong.
Magluwas sa request, magapadala man sang sulat ang grupo sa Land Transportation Franchising and Regulatory Board (LTFRB) nahanungod sa ila subsidy.
Una na nga nag-file sang request ang ATOP nga pasakaan ang ila flag down apang wala na gindayon bangud sang ginpromisa nga fuel subsidy para sa mga taxi driver.
Apang ang fuel subsidy ang partial lamang.
Indi lamang ang ATOP ang maga-request sang provisional increase kundi mangin ang iban nga organisasyon sang taxi operators sa bilog nga pungsod.
