ILOILO CITY – Ginakabig nga dako nga bentaha para sa Association of Taxi Operators in Panay (ATOP) ang ipatuman nga Local Public Transport Route Plan (LPTRP) sa syudad sang Iloilo sa Hunyo 12.
Sa interview sang Bombo Radyo kay Mr. Perfecto Yap, presidente sang ATOP, iya ginpahayag nga ginalauman nga dako ang demand sang taxi bangud nga tuman ka gamay ang mga jeep nga magabyahe.
Sa bilog nga Panay, nagdangat sa masobra sa 2, 200 ang unit sang taxi apang indi tanan ang mahimo nga makagwa bangud sang pila ka konsiderasyon.
Ang iban sa mga unit ang ginapaidalom sa maintenance kag ang iban nga unit ang wala sang driver bangud nga wala nagabyahe bangud sang epekto sang COVID-19 pandemic kag sa padayon nga nagataas nga presyo sang gatung.
Dugang pa ni Yap, ang iban naman nga mga taxi operators ang maid-id sa ila pag-hire sang mga drivers bangud sa eksperyensya nga indi consistent ang reporting sang mga ini gani manubo ang available nga taxi drivers sa subong.
