Gintapos na sang Wales ang 64 ka tuig nga paghulat agud nga maka-sulod sa World Cup.
Ginpierde sini ang Ukraine, 1-0, sa play-off final sa Cardiff City Stadium sa Cardiff, Wales.
Sulod ang Wales sa Group B kag atubangon ang England, United States kag Iran sa FIFA World Cup 2022 sa Qatar sa Nobyembre.
Pareho nga tuman ka importante para sa Ukraine kag Wales ang amo nga hampang.
Gutom ang Wales sa kadalag-an bangud 1958 pa sang katapusan nga nakit-an sa World Cup ang Welsh football team.
Sunod sini, asud-asud na nga kapaslawan ang natabo sa team. Nag-qualify ang team sa Euro 2016 — ang tion nga natapos ang 58-anyos nga paghulat sa major tournament kag sunod nga nakalab-ot sa first semi-final sa France. Sunod sini amo ang pag-qualify sa Euro 2020, apang lain nga lebel ang pag-qualify sini sa World Cup.
Sa bahin sang Ukraine, ini man kuntani ang tion agud nga mapakita ang pwersa kag mahatagan dungog kag kusog ang pungsod nga subong gina-atake sang Russia.
Sang play-off semi-finals, nangin emosyonal man ang Ukrainian football fans sang ginpierde sang Ukraine ang Scotland, 3-1, sa Hampden Park sa Glasgow, Scotland.
Apang sa hampang batok sa Wales, ngkabos ang Ukraine sa tuyo sini nga makalab-ot sa ikaduha nga World Cup sa maragtas sang team.
Samtang nagahampang sa Cardiff, todo-cheer ang supporters sang Ukraine lakip na ang 100 ka refugees nga ginhatagan sang Football Association of Wales sang free tickets.
Mangin ang home fans ukon ang fans sang Wales ang nagpakita man sang ila nga official “warm Welsh welcome” sa mga taga-Ukraine bilang suporta sa pungsod nga naipit subong sa pagpang-atake sang kaiping nga pungsod Russia.
