ILOILO CITY – Liwat nga nagpanawagan si Iloilo City mayor Jerry Treñas sa publiko nga mag-avail na sang ikaduha nga booster shot.
Sa interview sang Bombo Radyo kay mayor Treñas, iya ginpahayag nga ang ikaduha nga booster shot ang limitado lang sa subong sa mga senior citizen, immuno-compromised persons kag mga health workers.
Mismo ang alkalde ang nakabaton na sang ikaduha niya nga booster shot sang Huwebes, Hunyo 2 bangud nga isa siya ka senior citizen.
Suno kay Treñas, importante ang ikaduha nga booster shot bangud nga nagapanaog na ang efficacy sang bakuna.
Mahimo nga maka-avail sini anum ka bulan pagkatapos sang una nga booster shot.
Bukas ang tanan nga mga district health centers sa syudad para sa mga vulnerable sector agud nga mag-avail na sang booster shots.
