Balantayan subong nga adlaw, Hunyo 7, ang bantamweight unification rematch sa tunga ni four-division champion Nonito Donaire Jr. kag WBA kag IBF world bantamweight champion nga si Naoya Inoue.
Patigayunon ang hampang sa tunga sang “The Filipino Flash” kag “The Monster” sa Super Arena sa Saitama, Japan, venue kun sa diin man ginpatigayon ang ila una nga sambuwa sang 2019.
Ginpatigayon ang weigh-in kahapon — nagabug-at ang 39-anyos nga si Donaire sang 117.8 pounds samtang 118 pounds naman ang 29-anyos nga undefeated Japanese nga si Inoue.
Gintawag ni Donaire nga ini ang “biggest fight” sang iya nga boxing career, kag kumpyansa siya nga tapuson ang undefeated run ni Inoue subong nga tuig.
Si Donaire amo subong ang nagauyat sang WBC world bantamweight title, kag ginakilala man nga oldest world champion sa 118 pounds.
Sang 2019, nalutos ni Inoue si Donaire paagi sa unanimous decision sa isa ka bout nga ginkabig bilang Fight of the Year.
Ang Pinoy nga boksidor ang may yara sang 42-6 nga rekord nga may 28 ka knockouts, apang nagapabilin nga underdog sa rematch batok sa nasambit nga Japanese star.
Una na nga nagsiling si Donaire nga si Inoue ang best fighter sa 118-pound division, apang pahayag sini, nabatyagan niya nga wala siya sa 100 percent sa iya nga pwersa sang napierde siya sa 12-round clash batok sa IBF-WBA bantam king nga Japanese star sang 2019.
Kumpyansa siya nga lain na ang resulta sa subong nga adlaw, ilabi na bangud sa iya kadalag-an batok sa duha ka undefeated fighters nga sanday Moroccan boxer Nordine Oubaali sang Mayo 2021 kag Pinoy nga si Reymart Gaballo sang Disyembre sa amo man nga tuig.
Isa ka 4-division champion si Donaire kag nagatuyo nga mangin una nga Pinoy undisputed champion.
Kun sin-o man ang magdaog sa tunga ni Donaire kag Inoue, posible nga mag-atubang kay Paul Butler nga amo ang bag-o nga ginkoronahan nga WBO bantamweight champion.
