ILOILO CITY- Pilason ang tatlo ka mga pasahero sang ceres bus nga may ruta nga Estancia- Iloilo City matapos nga nagwaras kag nagpangbuno ang isa ka lalaki nga sakay man sini.
Sa interview sang Bombo Radyo kay PLt. Danilo Noca, hepe sang Ajuy Municipal Police Station, iya ginpahayag nga halin sa Estancia ang bus kag pag-abot sa banwa sang Sara, nagsakay ang lalaki.
Suno kay Noca, sang yara na sa bahin sang Morocoro,Ajuy ang bus, didto na nagwaras ang suspek nga si Rodel Ilagan, 41, residente sang Cubay, Jaro, Iloilo City kag ginpangbuno ang mga pasahero.
Ang nagkalapilasan amo sanday Jeramil Perez, 31, anyos nga may igo sa dughan; Mae Panes, 24, may igo sa dughan, hawak kag butkon; kag ang ila bata nga si Gavin Clyde,3 nga may igo sa likod.
Apisar may pilas, gintinguhaan ni Perez nga maagaw ang kutsilyo kay Ilagan gani napilasan man ang suspek tubtob nga nagbulig man ang iban nga pasahero kag napunggan si Ilagan.
Lunsay gindala sa Sara District Hospital ang mga biktima kag ang suspek.
Ginpahayag ni Noca nga indi kilala sang mga biktima ang lalaki nga nagbuno sa ila.
Dugang niya, indi man maistorya ang suspek kag padayon nga nagawaras samtang yara sa ospital kag ginabantayan naman sang mga kapulisan.
Wala pa natumod ang motibo sa amo nga pagpangbuno.
