Yara na sa paghinakop sang mga pulis ang tatlo ka mga suspek nga nagtaban sang ginabanta P1.6 million nga cash gikan sa Jetti Gasoline Station sa Barangay Tabuc Suba, Jaro, Iloilo City.
Ang mga suspek amo sanday Christopher Agonsola alias Tata, Mark Galvez alias Mako, kag Bryant Naya nga lunsay mga residente sang Barangay West Habog-habog, Molo, Iloilo City.
Si Naya ang una nga nadakpan sa amo man nga barangay paagi sa joint operation sang Jaro kag Molo Police Stations; samtang sanday Agonsola naman kag si Galvez ang lunsay nga nagsungka matapos nga ginpang-kumbinse sang ila tagsa ka pamilya.
Si Agonsola ang ginapahayag nga halin pa sa Bacolod City antes sini gin-turn over ang kaugalingon sa pulis kagab-i, samtang si Galvez naman ang halin pa sa Antique antes man ini nagsungka sa Molo Police Station.
Sa interview sang Bombo Radyo kay Pol. Capt. Eduardo Siacon, Jr., hepe sang Jaro Police Station, iya ginpahayag nga yara lang sa P240,000 nga cash ang ila nga na-recover gikan sa mga suspek — kantidad nga tuman ka layo gikan sa P1.6 million nga amo ang estimated nga nadula sa gasoline station.
P60,000 ang nakuha halin kay Naya, P100,000 ang nakuha halin kay Agonsola, kag P80,000 ang nakuha halin kay Galvez.
Magluwas sa cash, nakatuad man si Agonsala nga gingamit sini ang kuwarta sa pagbakal sang brand-new nga motorsiklo nga nagabalor P114,000.
Magluwas diri, sang nagpadulong siya sa Negros Occidental, nagpa-fiesta pa siya kag nag-gasto sang ginabanta P100,000.
Suno kay Siacon, isa-isahon pa nila ang mga suspek tubtub matuad tanan kun sa diin nagkadto ang kuwarta nga ila gintunga sang adlaw nga ginhimo ang pagpangawat.
SUSPEK MAN SA PAGRANSAK SA GAS STATION SA OTON
Ginkumpirma naman ni Iloilo City Police Office (ICPO) Director Pol. Col. Leo Batiles nga ang nadakpan nga si Naya amo man ang isa sang gintumod sang Oton Police Station nga nagransak man sa Caltex Gasoline Station sa banwa sang Oton.
Natabo ang pagsulod sa gasoline station sa Oton sang nagligad nga Mayo 19.
Sa interview sang Bombo Radyo kay Batiles, iya ginpahayag nga sang natabo ang pagransak sa gasolinahan sa Jaro, nangin sunod-sunod na ang koordinasyon nga ginhimo sang Oton MPS agud mapaanggid ang mga ginalantaw suspek.
Nakilala si Naya bangud may nakakita sa iya sa lugar sa Oton antes ang pagpangawat. Ginapahayag nga napasaka na sang Oton Municipal Police Station ang kaso nga robbery batok kay Naya.
BALIK SA PRESUHAN
Samtang, natukiban man nga bag-o lang naguwa sa presuhan ang suspek nga si Galvez.
Sa interview sang Bombo Radyo kay Juliet Dingcong, tiya ni Galvez, iya ginpahayag nga Marso lang subong nga tuig sang naka-guwa ang iya nga hinablos sa presuhan bangud sa kaso sa iligal nga droga.
Gin-ako sang tiya nga nagagamit sang iligal nga droga sadto si Galvez apang wala nagabaligya.
Indi man masigurado sang tiya kun nagbalik ini sa iya nga kahilabtanan sa iligal nga droga sang naka-guwa na sa presuhan, apang ang mapat-od niya amo nga nagtrabaho ini sa construction.
Sandig sa panaysayon ni Galvez sa iya pamilya, wala sila sang plano nga ransakon ang Jetti Gasoline Station sang Martes, apang naagyan nga wala sang tawo gani nga nahimo ang pagpangawat. ##
