ILOILO CITY – Maga-atubangay sa isa ka exhibition fight ang American boxer nga si Floyd Mayweather batuk sa mixed martial arts (MMA) fighter nga si Mikuru Asakura nga pagahiwaton sa Japan.
Si Mayweather ang nag-anunsiyo sang 2015 nga magaretiro na apang nagbalik agud lutuson si Conor McGregor sang 2017 nga nagpaayo pa sang iya professional record nga 50-0.
Suno sa mga promotor, ang away ang patigayunon sa Setyembre apang ang petsa, venue kag rules sang hampang ang iganunsiyo pa subong nga bulan.
Ini na ang mangin ikaduha nga exhibition bout ni Mayweather sa Japan pagkatapos sang first round TKO win batuk sa kickboxer nga si Tenshin Nasukawa sang 2018.
Ang pinakaulihi nga hampang ni Mayweather amo ang isa ka exhibition bout batuk kay Don Moore sa Abu Dhabi nga ginpatigayon sang Mayo kun sa diin, nagdaog ini.
