Nagapabilin sa ospital ang isa ka empleyado sang Department of Trade and Industry (DTI) kag ang duha ka graduating students matapos nga nag-collapse ang ila ginatabukan nga foot bridge sa Brgy. Latazon, Laua-an, Antique.
Ang mga biktima amo sanday Michael Villavert, 22, Information Technology (IT) staff sang DTI-Antique, kag residente sang Brgy. 6, San Jose Antique nga nakaangkon sang pilas sa ulo kag nawong; si Arlene Bangcaya, 22, estudyante, residente sang Brgy. Necesito, Laua-an nga nakaangkon naman sang bali sa batiis; kag si Allen Joy Necor, estudyante, kag residente man sang Brgy. Intao, Laua-an nga nakaangkon naman sang pilas sa bibig kag kilay.
Sa interview sang Bombo Radyo kay Police Captain Bryan Alamo, hepe sang Laua-an Municipal Police Station, iya ginpahayag nga nagikan ang mga biktima sa launching sang programa sang Laua-an LGU kag Shared Service Facility sang DTI sa amo nga barangay.
Sang yara na sa footbridge, ginapahayag nga nag-collapse ang tower nga amo ang naga-hold sang suspension sang taytay.
Suno kay Alamo, napilpilan gid si Villavert kag amo ang natam-an sa insidente rason nga gin-refer pa ini sa ospital sa Iloilo City agud maoperahan ang ulo.
May minor injuries naman ang duha ka estudyante nga lunsay may on-the-job training (OJT) sa DTI-Antique.
May iban pa nga nga staff sang DTI nga nakatabok sa amo nga foot bridge antes ini mag-collapse.
Ginapahayag duha ka tuig pa lang nga ginagamit sang mga residente ang amo nga taytay.
Sa bahin sang pulis, may ginpadala na nga sulat sa Municipal Engineering Office para sa pag-conduct sang technical investigation agud matul-id ang rason sang pag-collapse sang amo nga taytay.
