ILOILO CITY – Gin-anunsiyo sang aktor nga si Tom Rodriguez nga divorced na sila sang aktres nga si Carla Abellana.
Sa ginpagwa ng statement ni Tom, ginpahayag sini nga nagbiya siya sa Pilipinas sang Marso 13 kag nagpadulong sa Estados Unidos sa iya nga pamilya matapos nga nareyalisar niya nga apisar sang tanan niya nga paghimakas, gintapos sa gihapon ni Carla ang ila nga pag-asawahay.
Madamo man ang naghambal sang malain batuk sa iya, sila lang ni Carla ang nakahibalo sang matuod.
Gin-ako ni Tom nga indi man perfect ang ila nga nangin relasyon apang nahibaluan nila kun daw ano nila ka palangga ang isa kag isa.
Kabahin sang kasaypanan ni Tom amo nga gintunto siya sang isa ka tawo kun sa diin, nadula ang iya tanan nga kwarta.
Ginpanginwala man niya nga ginsakit niya si Carla.
Wala man niya gindetalye pa ang rason sang ila nga pagbulagay apang madamo suno sa iya sang mga istorya nga nagguluwa nga indi matuod kag unfair para sa iya.
Ginbaton niya ang desisyon ni Carla nga magbulagay na kag magatinir siya anay sa US.
Subong nga final na ang divorce decree, wish ni Tom nga sa kaadlawan ni Carla, matuman ang iya handum nga mangin malipayon.
Nahibaluan nga si Carla ang nagsaulog sang iya kaadlawan sang Hunyo 12.
Sa iya IG post, ginpahayag ni Carla nga ang birthday wish niya amo nga mangin malipayon.
Oktubre 23, 2021 sang ginkasal ang duha sa simbahan sa Batangas kag pagkatapos sang tatlo ka bulan, naggwa ang espekulasyon nga bulagay na ang mga ini.
