ILOILO CITY – Wala sang may matabo nga stagflation sa pungsod suno kay outgoing Department of Trade and Industry (DTI) Secretary Ramon Lopez.
Ang stagflation ang nagakatabo sa tion nga may yara sang mahinay nga economic growth, mataas nga inflation kag unemployment rate.
Suno kay Lopez, indi matabo ang stagflation bangud sang growth momentum nga gina-eksperyensyahan sang pungsod apisar sang mga kabudlay.
Sa World Bank’s Philippines Economic Update sa Hunyo 2022, ang ekonomiya sang pungsod ang mahimo nga magtaas pa sa 5.7 percent sa 2022 kag 5.6 percent sa 2023 kag 2024.
Una na nga ginpahayag sang International Monetary Fund (IMF) nga ang Asian region ang nagapangatubang sang stagflationary outlook kun sa diin, manubo ang economic growth kun ikumpara sa ginalauman kag mataas ang inflation.
Suno naman kay Lopez, ang economic growth ang magapadayon sa kondisyon nga wala sang lockdown kag nagataas ang employment rate.
Nahibaluan nga 2.76 million ka mga Pilipino ang wala sang trabaho sang Abril kag ang unemployment rate ang nagnubo sang 5.7 percent suno sa Philippine Statistics Bureau.
