Patay ang isa ka babayi sa India matapos nga gin-atake sang grupo sang mga elepante, apang wala diri nagtapos ang istorya, bangud sa isa ka indi kinaandan nga hitabo, nagbalik ang amo nga grupo sang mga sapat agud atakehon liwat ang bangkay sang biktima.
Sang adlaw nga natabo ang insidente, tuyo kuntani sang 68-anyos nga si Maya Murmu nga magkuha sang tubig sa kaiping nga lugar sa Mayurbhanj district sang Odisha, India.
Sa amo nga tion, gulpi nga nagtuhaw ang grupo sang mga elepante.
Nagtinguha pa ang babayi nga magpalagyo, apang isa ka elepante ang nag-atake sa iya nga nangin rason sang iya patal nga mga pilas.
Wala na natabangan si Murmu apisar nga gindala pa siya sa ospital.
Sunod nga ginhimos ang bangkay sang babayi. Samtang nga gina-preparar ini para sa cremation,nakibot ang mga residente sang gulpi lang nga nagpakita liwat ang amo nga mga sapat halin sa kagulangan.
Sa kakulba sang mga tawo, mansig sila nagpalalagyo sa amo nga lugar kag ginbayaan ang bangkay.
Ang natabo, suno sa report, ginpalapitan sang isa ka elepante ang bangkay kag ginhaboy paibabaw, samtang ang iban niya nga mga upod ang naghalit sa mga balay sang biktima amo man sang iya nga mga kaingod.
Wala na sang iban pa nga residente nga gin-report nga nahalitan.
Sa separado nga interview kay Duncan McNair abogado kag founder sang conservation charity nga Save The Asian Elephants ginpahanumdom sini sa publiko nga apisar mabuot nga sahi sang sapat ang mga elepante, delikado sila kag posible gid nga mangpatay ‘ilabi na kun gina-garit garit ukon ginaabusuhan.’
Para kayMcNair, posible nga maangot sa “extraordinary cognitive abilities” sang mga elepante ang natabo sa ikaduha nga bes nila nga pagpang-atake.
Misteryo subong para sa publiko ‘kun ano ang nahimo sang babayi’ nga posible rason sang ‘pagtimalos’ sang amo nga mga sapat.
Ginpadayon naman sang mga residente ang pagpalubong sa babayi pagkasunod nga adlaw.
Sa testimoniya sang mga nagapuyo sa lugar, ginsaad nga ini ang una nga bes nga nakit-an nga nangin bayolente ang grupo sang mga elepante.
Ginpahayag naman ni Rabi Narayan Mohanty, assistant conservator of forests, nga gina-proseso na subong ang paghatag sang kompensasyon sa pamilya sang napatay nga babayi.
