ILOILO CITY – Naka-agum sang pilas sa nagkalain-lain nga bahin sang lawas ang tatlo ka mga persona lakip na ang walo ka bulan nga bata sang aksidente nga nabunggu-an sang isa ka salakyan ang baligyaan sang buko juice sa Brgy. Zone 11, Cabatuan, Iloilo.
Ang mga biktima amo sanday Natividad Alegre, 48; Renalyn Alegre, 20; kag bata sini nga walo ka bulan.
Ang driver naman sang salakyan amo si Reniel Gallano sang Barangay Alegria, Sibunag, Guimaras.
Sa interview sang Bombo Radyo kay Police Staff Sergeant Linel Tormon, traffic investigator sang Cabatuan Muncipal Police Station, iya ginpahayag nga halin sa syudad sang Iloilo ang salakyan kag padulong sa Barangay Takdangan, Cabatuan kag sang nakaabot sa lugar, nadulaan ini sang kontrol kag nagdiretso sa tyangge.
Bangud sini, nawasak ang nauna nga bahin sang salakyan, guba ang side mirror kag nagasgasan.
Gindala naman sa ospital ang tatlo ka biktima.
Si Natividad ang naka-agum sang fracture sa iya tuo nga tiil, tul-an kag gusok kag nagapalanakit ang lawas.
Samtang si Renalyn naman ang may pilas sa wala nga tiil kag nagasakit ang hawak kag ang walo ka bulan nga bata ang may gasgas sa ibabaw sang dalunggan.
Yara sa custody sang Cabatuan PNP ang driver sang salakyan kag naka-istorya na sa pamilya sang mga biktima.
Nakahanda naman ini nga magbulig sa mga napilasan.
