ILOILO CITY – May nakita nga dako nga pagbag-o sa pagpatuman sang Local Public Transport Route Plan (LPTRP) sa syudad sang Iloilo sa ika-tatlo nga Lunes.
Sa interview sang Bombo Radyo kay Mr. Jeck Conlu, pinuno sang Public Safety and Transportation Management Office (PSTMO), iya ginpahayag nga manageable na ang apat ka mga terminal sa syudad.
Apisar nga may yara sa gihapon sang pagpila sa mga terminal, madasig lang ang pagsaka sang mga pasahero bangud man sang nagdugang nga numero sang unit sang jeep nga nagbyahe.
Suno kay Conlu, sa Mohon Terminal, may yara sa gihapon sang dako nga volume sang pasahero bangud mas manubo ang numero sang unit sang city loop nga jeep apang wala sang problema nga na-encounter.
Dugang pa niya, nakahibalo na ang tawo kun ano nga jeep ang ila sakyan rason nga wala na halos sang may nagapinamangkutanay sa terminal.
Bukas man ang syudad sa ano man nga suhestiyon kag reklamo angut sa pagpatuman sang LPTRP kag nagdangat na sa 18 ka mga ruta ang gin-adjust.
Sa subong, may yara na sang 1, 209 ka unit sang jeep ang nahatagan sang special permit ukon provisional authority agud nga magbyahe samtang nga wala pa sang bastante nga numero sang modernized jeepney.
