ILOILO CITY – Sa labing una nga tion matapos ang pila ka tuig nga indi maayo nga pagtamdanay, liwat nga nag-interact sanday re-elected Iloilo City Lone District Representative Juliene “Jamjam” Baronda kag elected Iloilo City Councilor Plaridel Nava pagkatapos sang ginpatigayon nga inauguration kagina sang aga, Hunyo 27.
Sa interview sang Bombo Radyo kay Representative Baronda, iya ginpahayag nga nagpalapit sa iya si Nava kag nag ulu-agbay.
Bilang balos, nag-thumbs up sign si Baronda.
Suno sa iya, wala gid niya naintindihan ang kabug-usan sang ginhambal ni Nava apang klaro amo nga “para sa unity”.
Dugang pa ni Baronda, siya ang sahi sang tawo nga nagalantaw sa maayo nga bahin sang isa man ka tawo.
Wala sang impormasyon ang kongresista kun bala nagpakig-angot man si Nava sa iya ginikanan.
Si Baronda kag Nava ang su-od nga mag-abyanay sang sila ang pareho pa nga konsehal sang syudad kag nagsugod ang indi maayo nga pagtamdanay sang nagpadalagan na si Baronda bilang kongresista kag nagdaog.
