ILOILO CITY – Matapos nga nag-lapse kag wala napirmahan ni anay Presidente Rodrigo Duterte ang hagna nga nagahatag sang dugang nga benepisyo sa mga solo parent, dalayon na ini nga nangin isa ka layi.
Santo sa layi, ang isa hagna ukon bill nga napasa sa Kongreso ukon wala napirmahan sang presidente sa sulod sang 30 ka adlaw humalin sang ginpasa sa Malacañang ang otomatiko nga mangin layi.
Mangin epektibo ini 15 ka adaw matapos nga nabalhag ukon na publicize.
Ang solo parent bill ang wala napirmahan ni Duterte rason nga nag-lapse bilang layi sang June 4, 2022.
Sa interview sang Bombo Radyo kay Atty. Xyster Amar, Bombo abogado, iya ginpahayag nga sa idalom sang Republic Act No. 11861 ukon ang Expanded Solo Parents Welfare Act, ang mga low-income solo parents ang makabaton na sang P1,000 nga monthly cash subsidy.
Dugang pa ni Atty. Amar, sa daan nga Republic Act 8972 ukon ang Solo Parents’ Welfare Act of 2000, makabig nga solo parent ang isa ka indibidwal matapos nga ginbayaan sa sulod na sang isa ka tuig.
Apang sa bag-o nga layi, ginpanubu-an nalang ini sa anum ka bulan.
Magluwas sa P1,000 nga cash aid sa tagsa ka bulan para sa mga single parents nga ang income ang manubo pa sa poverty line, ang solo parent nga nagakita sang mas manubo sa P250,000 sa kada tuig ang maka-avail sang 10% discount sa gatas sang bata, pagkaon kag micronutrient supplements kag sanitary diapers, bulong, bakuna kag iban pa nga medical supplement nga ginbakal para sa bata nga naga-edad tubtob sa anum ka tuig.
Ang mga lolo kag lola naman nga amo ang nagasagud sa mga apo nga menor de edad ang makabaton man sang prebilihiyo sang mga single parents.
Sa amo man nga layi, ang Department of Education (DepEd), Commission on Higher Education (CHED), kag ang Technical Education and Skills Development Authority (TESDA) nga maghatag sang scholarship sa mga kwalipikado nga bata sang solo parents sa institusyon sang basic, higher, kag technical/vocational education kag training.
Awtomatiko man nga maka-avail sang National Health Insurance program sang PhilHealth kag ang gobyerno ang magabayad sa ila nga PhilHealth Premium.
Prayoridad man sila nga hatagan sang trabaho kag low-cost housing projects kag iban pa.
Agud nga ma-avail ang ini nga mga benepisyo, kinahanglan lang nga magpakita sang solo parent identification card.
Ang daan nga RA 8972 ang nangin layi sang Nobyembre 7, 2000 kag nangin epektibo sang Nobyembre 28 sa amo man nga tuig.
Makabig nga solo parent ang isa ka indibidwal sa idalom sang sini nga mga kwalipikasyon:
a. babayi nga nagbata nga biktima sang pagpanghimulos kag iban pa nga krimen apisar nga wala pa sang financial conviction sa kaso sa kondisyon nga ang iloy ang magapadako sang bata;
b. ang mga ginikanan nga nabilin kag naga-isahanon nga nagapadako sang kabataan bangud nga napatay ang partner, napreso ang partner, physical ukon mental incapacity sang partner, legal ukon de facto separation, opisyal na nga nagpakigbulag sa partner kag amo ang naga-isahanon nga nagasagod sang kabataan;
c. indi kasado nga amay ukon iloy kag ginpili nga isahanon nga padakuon ang bata sa baylo nga ipasagod sa iban nga tawo ukon institusyon.
