Nadakpan sang militar ang isa ka ginapahayag high-ranking female official sang New People’s Army (NPA) matapos ang engkwentro sa tunga sang 79th Infantry Battalion kag rebelde nga grupo sa Sitio Banwa Minatay, Brgy Marcelo, Calatrava, Negros Occidental.
Sa interview sang Bombo Radyo kay Captain Kim Apitong, spokesperson sang 3rd Infantry Division sang Philippine Army, iya ginpahayag nga ang naaresto sang otoridad amo si Isabel Necesario (nga kilala man nga si Maolin), ang ginatudlo nga deputy secretary sang North Negros Front.
Nagapangita pa ang militar sang dugang nga data agud nga mahibaluan kun sa diin pa nga mga operasyon involved ang babayi nga nadakpan.
Suno kay Apitong, yara na si Necesario sa Calatrava Municipal Police Station kag natalana nga pasakaan sang kaso nga illegal possession of firearms and explosives.
Lakip sa recoveries sa lugar kun sa diin nagluntad ang ginabanta 20 ka minutos nga engkwentro amo ang duha ka rifle grenade, duha ka caliber .38, kag mga bala.
Antes nadakpan si Necesario, may separado nga operasyon ang militar kun sa diin apat ka myembro sang Communist Party of the Philippines-New People’s Army (CPP-NPA) ang napatay sa Barangay Santol sa Binalbagan, Negros Occidental.
Ginapahayag nga 14 tanan ka mga rebelde ang involved sa amo nga engkwentro. Na-recover ang mga bangkay kag pila ka armas-luthang, mga suplay, kag personal items sa encounter site.
