Nakuha sang Serbian tennis star nga si Novak Djokovic ang iya ika-pito nga Wimbledon men’s singles title (apat diri ang sunod-sunod nga titulo) kag ang iya ika-21 nga grand slam title overall matapos ginlutos ang Australian maverick nga si Nick Kyrgios sa Centre Court sa London, 4-6, 6-3, 6-4, 6-6.
Ang amo nga Wimbledon match amo ang una nga Grand Slam final sang 27-anyos nga si Kyrgios kag ika-32 naman para sa 35-anyos nga si Djokovic.
Sa handum ni Kyrgios nga mangin labing-una nga male Grand slam champion sang Australia sa sulod na sang 20 ka tuig, nagpakitang-gilas ini kag nadag-an ang first set sa sulod lang sang 31 ka minutos.
Wala man nagpasugot si Djokovic kag gingamit naman sini ang iya eksperyensya kag disiplina agud nga mabasahan ang hulag ni Kyrgios kag madominar ang second set, 6-3, nga amo ang nangin turning point sa hampang.
Si Djokovic amo man ang winner sa amo nga prestihiyoso nga tennis tournament sang 2018, 2019 kag 2021 (wala natigayon ang 2020 tournament bangud sa Covid-19 pandemic).
Bangud sini, isa na lang ka grand slam title ang abanse sang men’s all-time record holder nga si Rafael Nadal sang Espanya.
