Naghimo sang maragtas ang national women’s football team matapos nadag-an ang labing-una nga titulo para sa Pilipinas sa Asean Football Federation (AFF) Women’s Championship subong nga gab-i.
Ginlutos sang Filipinas ang Thailand, 3-0, sa finals sa 2022 edition sang tournament nga ginpatigayon sa Rizal Memorial Stadium sa Manila kun sa diin may 8,257 ka tumalan-aw nga naghinugyaw kag nagbulig agud nga mapaibwal pa ang determinasyon sang team nga mahatagan sang labing-una nga korona ang Pilipinas sa patag sang football.
Una nga naka-score para sa Pilipinas amo ang central defender nga si Jessica Cowart, kag sa ika-20 nga minuto sa first half, nagdugang pa ang abanse matapos naka-goal ang striker nga si Katrina Guillou.
Sa ika-89 naman nga minuto sang hampang, ginkumpleto ni Sarina Bolden ang scoring nga rason sang paghinugyaw sang mga Pinoy nga yara sa stadium.
Sampaw-sampaw na ini nga kadalag-an para sa Filipinas. Sang nagligad lang nga Enero subong nga tuig, naka-secure ang Filipinas sang spot sa 2023 FIFA Women’s World Cup matapos ginlutos ang Chinese Taipei sa AFC Asian Women’s Cup. Bronze medalist man ang team sa Southeast Asian (SEA) Games.
Sa semifinals sang Women’s Championship subong nga tuig, nangin maragtason na nga daan ang performance sang pungsod sang ginlutos sini ang SEA Games champion nga Vietnam paagi sa apat ka goals.
Ginakabig naman nga pagtimalos ang pag-atubang sang Pilipinas sa Thailand, ang pungsod nga apat ka beses na nga nagkampyeon sa amo nga kumpetisyon.
Sa group match pa lang sang Martes, Hulyo 12, Thailand na ang naghatag sang isahanon nga kapierdehan sa Pilipinas, 1-0.
Ang ila nga pagsambuwa sa finals amo na ang ika-apat nga bes sang ila nga pag-atubangay. Sa nauna nga mga kumpetisyon, duha ka beses nga nagdaog ang Thailand lakip na ang paglutos sa Pilipinas sa SEA Games semifinals, samtang daog naman ang Pilipinas sa Asian Football Confederation Women’s Asian Cup.
Yari ang kabahin sang pag-award sa players sang Filipinas.
