Nagmandu na si President Ferdinand Marcos Jr. sa mga opisyal sang Department of Agriculture (DA) nga makig-angot sa Bureau of Customs kag sa Kongreso agud nga madasig nga matapna ang smuggling sang ulutanon kag ang iligal nga importasyon sang iban pa nga agricultural products.
Si Marcos amo man ang nagapamuno subong sa DA. Ginhatag sini ang amo nga assignment sang ginpatigayon ang meeting sa main office sa Quezon City subong nga semana.
Ginpahayag ni Marcos nga kinahanglan man ang plano agud nga mapasigurado ang food supply kag presyo nga masarangan sang ordinaryo nga mga Pilipino.
Sang nagligad nga bulan, una na nagpahayag ang Bureau of Customs nga nagapakig-angot ini sa DA agud kakason ang smuggled items sa merkado sa pungsod.
Nagdeploy ang duha ka ahensya sang mga personnel sa mga merkado agud nga i-check kun may yara sang illegally imported agricultural products.
Kun basehan ang rekord sang Customs, halin sang 2016, may 103 na ka criminal complaints nga gin-file batok sa importers kag brokers nga amo ang iligal nga naga-ship sini sa Pilipinas.
Halin naman sang 2019, yara na sa P1.99 billion ang balor sang smuggled agricultural goods nga nakumpiskar sang Customs. ##
