Nagpaathag ang Police Regional Office (PRO) VI nga may nagakaigu nga training nga ginahatag sa mga pulis antes i-assign bilang imbestigador, apang kun may patigayunon nga retraining kag may maid-id nga pagtuon sa case build-up courses, mas maayo gid agud mapauswag pa ang performance.
Ini kasunod sang pahayag ni Justice Secretary Jesus Crispin Remulla nga kinahanglan id-idon ang abilidad sang mga pulis sa pag-imbestigar bangud subong, ang data nagapakita nga manubo sa 25% ang conviction rate sang mga kaso-kriminal sa Pilipinas.
Sa interview naman sang Bombo Radyo kay Pol. Lt. Col. Arnel Solis, spokesperson sang PRO 6, iya ginpahayag nga antes i-assign sang hepe ang isa ka police personnel nga mag-imbestigar sa isa ka kaso, may yara anay sang exam nga ginahatag. Apisar gradwado man sa Criminology ang mga pulis, may yara pa gid sang separado nga criminal investigation course nga ginatudlo ang Philippine National Police (PNP).
Kada tuig suno kay Solis, ginalantaw man sang Regional Investigation and Detective Management Division kun pila ang kinahanglan i-fill in nga investigator position, kun pila ang na-subject sa training, kag kun pila ang kinahanglan ipaidalom sa training.
Sa data naman nga ginpakita ni Interior Secretary Benhur Abalos, napahayag nga sa masobra 220,000 ka PNP personnel sa bilog nga pungsod, 22,000 ang ginakabig nga police investigators kag sa sini nga numero, 123 lang ang law graduates.
Suno naman kay Solis, diutay lang ang nagasulod sa PNP nga may law background. Kun mag-sulod gid man sa police force ang law graduate, ang entry position amo ang police captain via lateral entry. Kun nag-eskwela naman sang law ang PNP personnel kag makapasar sa BAR, mahimo ini maka-apply via lateral entry kag mangin police captain.
Ini man ang rason suno kay Solis kun ngaa may gina-provide gid nga separado nga training sa mga pulis para sa epektibo nga imbestigasyon sa mga kaso. ##
