ILOILO CITY – Nakabaton sang default notice nagikan sa grupo sang mga lenders nga ginapamunuan sang isa ka bangko ang firm sang Davao City-based tycoon nga si Dennis Uy.
Sa ginpagwa nga statement sang conglomerate ni Uy nga Udenna, nakabaton ini sang Notice of Declaration of Default sang Byernes nagikan sa asosasyon sang mga bangko bilang majority lender batuk sa Clark Global City Corp. (CGCC).
Ang CGCC ang subsidiary sang Udenna.
Ang default declaration notice ang ginpadala bangud sa sunud-sunod nga default nga indi na ma-remedyuhan may kaangtanan sa Master Lease Agreement sa tunga sang Clark International Airport Corporation (CIAC) kag Global Gateway Development Corporation (GGDC).
Santo sa report, ang kompaniya ni Uy ang nakabaton sang foreclosure notice nagikan sa isa ka bangko may kaangtanan sa kapaslawan sang business tycoon nga mag-update sang lease payments sa CIAC.
Apisar sini, ginpanginwala naman sang Udenna ang Notice of Declaration of Default.
Suno pa sa Udenna, ang GGDC kag CIAC ang nagabuligay para sa isa ka resolution nga indi magresulta sa bisan ano nga violation sa idalom sang Master Lease Agreement.
Pagkatapos nga nagpungko si anay Presidente Rodrigo Duterte sang 2016, nag-expand si Uy sang iya negosyo pinaagi sa debt-funded acquisitions and ventures lakip na ang pag-takeover sang Malampaya facility, pag-establish sang ikatatlo nga telco kag iban pa nga kompaniya.
