ILOILO CITY – Nagapati si Miss Universe Philippines 2020 Rabiya Mateo nga mahimo sa gihapon nga makipag-abyan sa anay partner.
Suno kay Rabiya, ang iya ex-boyfriend nga isa ka Ilonggo nga si Neil Salvacion ang sa gihapon, bestfriend niya.
Yara ini sa gihapon sa tion nga kinahanglan niya ang kadampig bilang isa ka abyan agud nga protektahan kag depensahan siya.
Suno pa sa iya, pito sila ka tuig nga nagkarelasyon kag wala sang may ginhambal nga malain si Neil batuk sa iya gani best friend niya ini sa gihapon.
Nangin supportive man si Neil sang nagpasakop ini sa Miss Universe.
Apang, ang pagpakig-abyan sa anay kahagugma ang mangin issue kun ang isa ang may yara na sang bag-o nga partner.
Nahibaluan nga naggwa ang espekulasyon nga bulagay na ang duha sang gin-delete ni Neil ang pictures nila ni Rabiya sa Instagram sang May 2021 kag pagkasunod nga bulan, ginkumpirmar ni Neil nga bulagay na sila.
Ulihi nga naka-date ni Rabiya ang aktor nga si Jeric Gonzales.
Gin-confirm ini sang duha sa Instagram sang March subong nga tuig apang gin-unfollow nila ang isa kag isa sang June.
Sang amo man nga bulan, nag-post si Rabiya sang iya picture kag may caption nga “Hi. Ako nga pala ang sinaing mo. Joke!”
Tubtob subong, wala pa nakapagwa sang statement ang magtimbang nga bahin angut diri.
